पारायण सोहळ्याची भव्य सांगता गोपाळकाला कीर्तन व दहीहंडी फोडून उत्साहात संपन्न
श्री साईबाबा संस्थान विश्वस्तव्यवस्था, शिर्डी, नाट्य रसिक मंच, शिर्डी आणि शिर्डी ग्रामस्थ यांच्या संयुक्त विद्यमाने दिनांक २५ जुलै २०२५ रोजी सुरू झालेल्या श्री साईसचरित्र पारायण सोहळ्याची सांगता आज सकाळी ह.भ.प. श्री वैभव प्रदीप ओक (डोंबिवली) यांचे गोपाळकाला कीर्तनानंतर दहीहंडी फोडून झाली.
दिनांक ०१ ऑगस्ट २०२५ पर्यंत चाललेल्या या पारायण सोहळ्यात शिर्डी व पंचक्रोशीतून सुमारे ७ हजार पारायणार्थींनी सहभाग नोंदवला. काल (दि. ०१ ऑगस्ट) रोजी सकाळी अध्याय क्रमांक ५३ (अवतरणिका) चे वाचन होऊन श्री साईसचरित्र ग्रंथाची समाप्ती झाली. त्यानंतर संस्थानचे मुख्य कार्यकारी अधिकारी मा. गोरक्ष गाडीलकर व त्यांच्या सुविद्य पत्नी सौ. वंदना गाडीलकर यांच्या हस्ते ग्रंथपूजन संपन्न झाले. पारायण समाप्तीनिमित्त काल दुपारी ३.३० वाजता श्री साई सच्चरीत्र ग्रंथाची पारायण मंडपापासून सवाद्य मिरवणूक काढण्यात आली. या मिरवणुकीत पारंपरिक संबळ वाद्यांचे १० ते १२ पथके, श्री देव कुडाळेश्वर मित्र मंडळ, कुडाळ यांचे ३ धार्मिक देखावे असलेले चित्ररथ, तसेच रंजीनी आर्टस, मालाप्पुरा (केरळ) यांचे पारंपरिक वाद्य व दाक्षिणात्य नृत्यासह विविध सोंगे या मिरवणुकीचे विशेष आकर्षण ठरले.
आज सकाळी १०.०० ते १२.०० या वेळेत ह.भ.प. श्री वैभव प्रदीप ओक यांचे गोपाळकाला कीर्तन व दहीहंडी फोडून पारायण सोहळ्याची सांगता पार पडली. यावेळी संस्थानचे मुख्य कार्यकारी अधिकारी गोरक्ष गाडीलकर, उपमुख्य कार्यकारी अधिकारी भिमराज दराडे यांच्यासह श्री साईबाबा संस्थानचे अधिकारी, नाट्य रसिक मंचाचे पदाधिकारी, तसेच पारायणार्थी व ग्रामस्थ मोठ्या संख्येने उपस्थित होते. त्यानंतर दुपारी १२.३० ते ०४.०० या वेळेत महाप्रसादाचा कार्यक्रम पार पडला. तर, सायंकाळी ०७.३० ते ०९.३० या वेळेत ह.भ.प. श्री भानुदास महाराज बैरागी यांचा एकनाथी भारुड कार्यक्रम होणार आहे.
