श्री साईबाबा औद्योगिक प्रशिक्षण संस्थेत जर्मन भाषा प्रशिक्षण वर्गाचा शुभारंभ*
शिर्डी -
श्री साईबाबा संस्थान विश्वस्तव्यवस्था, शिर्डी संचलित *श्री साईबाबा औद्योगिक प्रशिक्षण संस्थायेथे प्रशिक्षणार्थ्यांसाठी जर्मन भाषा प्रशिक्षण वर्ग सुरू करण्यात आला आहे. या उपक्रमाचा शुभारंभ श्री साईबाबा संस्थानचे मुख्य कार्यकारी अधिकारी श्री. गोरक्ष गाडीलकर (भा.प्र.से.) यांच्या हस्ते करण्यात आला.
उद्घाटन प्रसंगी श्री. गाडीलकर यांनी मार्गदर्शन करताना सांगितले की, संस्थेत प्रशिक्षण घेणारे बहुतांश विद्यार्थी ग्रामीण व आर्थिक दुर्बल कुटुंबांतील आहेत. जर्मनीत नोकरीच्या संधी उपलब्ध होत असताना तिथे भाषा अडसर ठरत आहे. बाहेर जर्मन भाषा शिकण्याचा खर्च मोठा असल्याने ग्रामीण भागातील विद्यार्थ्यांसाठी हे कठीण होते. ही अडचण ओळखून संस्थानने विनामूल्य जर्मन भाषा प्रशिक्षण वर्ग सुरू केला आहे आणि यासाठी तज्ज्ञ प्रशिक्षकांची नियुक्ती केली आहे. विद्यार्थ्यांनी या संधीचा लाभ घेऊन परदेशी रोजगाराच्या संधी स्वीकाराव्यात, असे आवाहन त्यांनी केले.
या कार्यक्रमात संस्थेचे प्राचार्य श्री. अभयकुमार दुनाखे यांनी प्रास्ताविक केले, तर जर्मन भाषा प्रशिक्षक श्री. अभिजित धावडे यांनी विद्यार्थ्यांना जर्मन भाषेची माहिती दिली. गट निदेशक श्री. दादा जांभुळकर यांनी आभार मानले, तर श्री. विकास पाटील यांनी सूत्रसंचालन केले.
या प्रसंगी शैक्षणिक संकुलाचे प्रशासकीय अधिकारी श्री. विश्वनाथ बजाज, प्राचार्य श्री. अभयकुमार दुनाखे, गट निदेशक श्री. दादा जांभुळकर, विविध विभागांचे निदेशक आणि प्रशिक्षणार्थी मोठ्या संख्येने उपस्थित होते.
