शिर्डीत ‘श्री साई सोशल मीडिया समिट – 2025’चा उत्साहात समारोप
भारतभरातील २० राज्यांतील ३०० हून अधिक इन्फ्लुएन्सर्सची सहभागिता
शिर्डी –
श्री साईबाबा संस्थान, शिर्डी तर्फे आयोजित “श्री साई सोशल मीडिया समिट – 2025” हा भव्य सोहळा ५ व ६ ऑक्टोबर रोजी अत्यंत उत्साहात संपन्न झाला. देशभरातील वीस राज्यांमधील ३०० हून अधिक सोशल मीडिया इन्फ्लुएन्सर्सनी या ऐतिहासिक समिटमध्ये सहभाग घेतला व विशेष म्हणजे इंग्लंड येथून येऊन एका अनिवासी भारतीय इन्फ्लुएन्सरचाही यात समावेश होता.
पहिल्या दिवशी सर्व इन्फ्लुएन्सर्सनी श्री साईबाबांच्या समाधी मंदिर व द्वारकामाईचे दर्शन घेऊन मंदिर परिसर व दर्शन रांग संकुल पाहिले. त्यानंतर त्यांचे शैक्षणिक संकुलातील सभागृह मुख्य कार्यक्रम ठिकाणी आगमन होताच ढोल-ताशा, तुतारीच्या गजरात व गुलाबाचे फुले देऊन पारंपारिक पद्धतीने स्वागत करण्यात आले.
सुप्रसिद्ध गायक व साईभक्त सोनू निगम यांच्या उपस्थितीने संमेलनाची शोभा अधिकच वाढली. त्यांचे स्वागत मुख्य कार्यकारी अधिकारी गोरक्ष गाडिलकर यांनी शाल व श्री साईबाबांची मूर्ती देऊन केले.
समारंभात प्रमुख पाहुण्यांच्या हस्ते दीपप्रज्वलन व श्री साई पूजनानंतर उपमुख्य कार्यकारी अधिकारी भीमराज दराडे यांनी प्रास्ताविक करून संमेलनाचा उद्देश स्पष्ट केला. श्री गणेश वंदना व श्रीसाईपालखीच्या पारंपरिक कार्यक्रमाने समिटची सुरुवात रंगतदार झाली.
यानंतर श्री सोनू निगम यांच्या हस्ते “Blessings Button” या विशेष स्मृतिचिन्हाचे अनावरण करण्यात आले. यावेळी मनोगतात त्यांनी, “मी १९९२ पासून शिर्डीत येत आहे. आज मी येथे काही मागण्यासाठी नाही, तर श्री साईबाबांचे आभार मानण्यासाठी आलो आहे. माझ्या आयुष्यात जे काही मिळाले ते सगळे बाबांच्या कृपेनेच.” अशी भावना व्यक्त करत दोन सुंदर साईभजने सादर करून उपस्थितांना मंत्रमुग्ध केले.
समिटदरम्यान संस्थानचे मुख्य कार्यकारी अधिकारी गोरक्ष गाडिलकर यांनी संस्थानच्या ४० हून अधिक विभागांतून सुरू असलेल्या सेवाकार्यांचे प्रेझेंटेशन सादर केले. तर श्री साईबाबांचे जीवनचरित्राचे अभ्यासक श्री श्याम सुरेश, श्री कृष्णाजी, नरेंद्र नाशिरकर, सुमित पोंडा, शुभ्रम बहेल, यांनी श्री साईबाबांच्या महतीबाबत तर आशिष गोळवलकर,प्रसाद पाटील, अपूर्व मानकर, श्वेतांक नाईक यांनी सोशल मीडिया व AI तंत्रज्ञान या विषयांवर आपले विचार मांडले. तसेच गोपी फिल्म्स चे हर्ष पांड्या यांनी श्री साईबाबा संस्थान वर आधारित तयार केलेल्या 24 Hours Inside The Temple या लघुपटाचे ट्रेलर प्रदर्शित केले.
वक्त्यांच्या मनोगता दरम्यान विविध सांस्कृतिक कार्यक्रम तर संध्याकाळी शताब्दी मंडपात साई भजन संध्या उत्साहात संपन्न झाली.
इन्फ्लुएन्सर्स संवाद सत्रात अनेक influencer यांनी केलेल्या सूचनांची नोंदी घेतल्या. यानंतर सर्व influencer यांना मुख्य कार्यकारी अधिकारी गोरक्ष गाडिलकर यांच्या हस्ते Blessings Button वाटप करण्यात आले यावेळी उपमुख्य कार्यकारी अधिकारी भीमराज दराडे, प्रशासकीय अधिकारी संदीपकुमार भोसले, प्रज्ञा महांडुळे/सिनारे, विश्वनाथ बजाज, कार्यकारी अभियंता भिकन दाभाडे व विविध विभागांचे विभाग प्रमुख उपस्थित होते. कार्यक्रमाचे सूत्रसंचालन मनिलाल पटेल यांनी केले.
हे समिट यशस्वी होण्यासाठी संस्थानच्या विविध विभागांचे अधिकारी व कर्मचारी यांनी मोठे परिश्रम घेतले.
